台語文學，這條路…

[王羅蜜多]

這是一條觀眾少，噗仔聲也少的路。有人小可仔試過就無閣繼續，有人看無啥有就無愛看。雖然按呢，我總是行幾若冬矣，而且愈行愈有趣味。
像阮這款戰後嬰兒潮的囡仔，佇國小上課規定講華語，轉來厝冊包抨(phiann)落就換講母語。講母語是父母生成的，講的母語帶有父母的腔口。
除了父母傳教，彼時陣布袋戲、歌仔戲內底豐富的口白，亦對我影響真大。
大學畢業、退伍、開始佇公部門食頭路，已經是1977年。彼陣我佇農村服務，民眾中間，除了真少數的老榮民講華語或怹故鄉的毋語之外，其他的人攏講台語。所以，每次開會的中間，我攏全程用台語唸會議資料，用台語討論，真濟鄉民對我這个台語課員產生親切感。
真正積極用台語文作詩寫文章，是這幾冬的代誌。
台語文學佇台灣已經進行真久，但是也有真長的一段時間，一人一支鼓吹，對使用的文字各有主張，寫的範圍也有較e̍h。後來，教育部編辭典，兼囥佇網路方便使用，寫台文的人愈來愈濟，內容也愈來愈豐富。
寫台文，主要愛用台語思考。這對阮這種歐吉桑，是真自然的代誌，毋閣對習慣華語思考的少年人就需要轉換、訓練。以現代詩來講，台語佮華語有無仝款的優美佮藝術性，有無仝款的節奏佮聲調，有一寡華語詩的高手，轉過來寫台語，無外久就寫甲真好。
台語文學文字使用的爭論一直存在，無法度統一。我主張使用教育部的版本，予逐家方便查、有法度讀。如果遇著真奇怪，真歹理解，或是容易引起誤導的用字，就規氣插羅馬音。創作是欲予眾人讀的，毋是干但欲予家己看，或是特別欲予專家學者看的。
用台語思考，用台語寫作一段時間，就可能體會著伊的意義佮趣味，但統重要的，是愛堅持。吹鼓吹詩論壇的台語詩版，已經成立十三冬矣，開頭彼幾冬還閣燒烙，落尾愈來愈冷，火強欲hua去。
最近因為精神灌佇台語文創作，所以共站長參詳，辭掉散文詩版主，換來台語詩版推廣看覓。我亦是學習中，想欲佮逐家交流、相佮研究，祈請先進多多指教。
(2017/1/9)

<教育部台灣閩南語常用辭典>
http://twblg.dict.edu.tw/holodict_new/index.html

[陳美]

十三的月娘想起阿母的話猶原是頭＂犂犂
阮嘛毋知阿嬤伊講過的話，閣賰幾分圓⋯

新年新希望！但願，同齊加油 Y((^_^))Y

[陳美]

抱歉！訂正錯字

十三的月娘想起阿母的話猶原是頭犁犁
阮嘛毋知阿嬤伊講過的話，閣賰幾分圓

新年新希望！但願，同齊加油 Y((^_^))Y

[王羅蜜多]

抱歉！訂正錯字

十三的月娘想起阿母的話猶原是頭犁犁
阮嘛毋知阿嬤伊講過的話，閣賰幾分圓

新年新希望！但願，同齊加油 Y((^_^))Y

月娘若覕佇雲後，咱就做伙拍鑼鼓叫予出來。阿嬤的話是傳家寶，是無價之寶啊!
新年新向望，做伙來寫台語詩，加油!