〈啥物上好〉
我時常佇半暝醒起
目睭霧霧
揣無夢的出口
戆戇神神閣再睏去
有時陣是因為粉鳥展大尿咧緊
爬起清理門戶
頭殼猶原袂清袂楚
是佇夢中仰是佇夢中咧作夢
桃花女睏甲真好勢
我干焦欣羨眠床頂彼首老媠老媠的詩
醫生講我肝害腎敗
賰一隻喙歕答滴
我想這款代誌
毋免閣予腰子拖磨
氣血嘛要顧好
來去廟口甲人唱歌弄曲
行棋敲唬膦
嘛會當燒香點火保庇一家大細平安
時常置半暝醒起
恬恬看我身邊的老花蕊
實在要感謝伊陪我行過這个彎彎斡斡的跤跡
有激骨話孝男話
還閣有粗魯的幹話
伊攏吞落去
啥物上好
嘛是老某老猴相偎靠
2017.8.25 游鍫良